Harpa skilar bæði beinum og óbeinum tekjum
Tónlistar- og ráðstefnuhúsið Harpa skilar þjóðarbúinu bæði beinum og óbeinum tekjum samkvæmt nýrri skýrslu Hagfræðistofnunar Háskóla Íslands.
Hagfræðistofnun telur að tekjur tilkomnar vegna Hörpu séu á bilinu 1,0 til 1,4 milljarðar króna á ári og geti orðið allt að 3 milljarðar króna á ári ef vel gangi að kynna húsið og fá stórar ráðstefnur til landsins.
Mestu munar um bætta ráðstefnuaðstöðu hér á landi með tilkomu Hörpu en einnig hafa tónlistarviðburðir í húsinu þegar dregið hundruð ferðamanna til Íslands og haft talsverð áhrif á bókanir ferðaþjónustuaðila. Ætla má að beinar og óbeinar viðbótargjaldeyristekjur vegna tónlistar- og ráðstefnuhússins Hörpu geti numið 1,0-1,4 milljörðum kr. árlega, eftir að tekið hefur verið tillit til ruðningsáhrifa. Sú tala gæti þó hækkað verulega að mati stofnunarinnar ef fleiri koma til landsins vegna Hörpu. Tekjur af 12.000 útlendingum sem kæmu sérstaklega vegna ráðstefna í Hörpu gætu numið á bilinu 2,1-3,0 milljörðum króna á ári. Þetta kemur fram í nýrri skýrslu Hagfræðistofnunar Háskóla Íslands og er fyrsti liður í fjölþættri rannsókn.
Sjá nánrar á harpa.is