Verkefni Austurhafnar, samkvæmt samningi ríkis og borgar um byggingu tónlistarhúss og ráðstefnumiðstöðvar frá apríl árið 2002, er að láta byggja og koma í rekstur tónlistarhúsi og ráðstefnumiðstöð í tengslum við hótel við Austurbakka Reykjavíkurhafnar með svokallaðri einkaframkvæmd, þ.e. einkaaðili skyldi annast jafnt hönnun, byggingu, fjármögnun og rekstur mannvirkjanna.
Setti stjórn félagsins sér strax sem markmið að:
- Skapa sterka menningarlega ímynd sem dregur athygli alheims að Reykjavík og Íslandi
- Styrkja stöðu landsins í alþjóðlegri samkeppni á sviði menningar og ferðamála
- Skapa skilyrði fyrir alþjóðlega menningarviðburði og bæta aðstæður til að taka á móti heimsþekktum listamönnum
- Auðga íslenskt menningarlíf og skapa alþjóðleg tengsl á sviði menningar
- Skapa fyrsta flokks aðstöðu fyrir Sinfóníuhljómsveit Íslands